Facebook Page: Sigumdic 是咁的 - 科技 創業 投資

si
gum
dic.

SAFE - 信任

July 24, 2020

是咁的,元朗天水圍除左有牛同農村同棕地,大家都嚮往可能係佢既人情味。鄉村生活簡單,比城市的確多左一種猶然而生既信任。我騎住牛牛出市區,去到五光十色既薄扶林,見識到呢個世界既平行時空。BBA既世界令你見識何謂趨炎附勢,初入大學嚇到朋友都唔想識。係呢個圈子入面,利益同信任恍如一個相互排斥嘅概念。

進入商業世界,開始學識呢到既潛規則。係投資界入面,係未有信任基礎下前設,而要白紙黑字既法律文件寫清楚,寫多一條條款、少一隻字,可能都會影響利益。所以臨比錢前既terms negotiation 先係最陰濕,笑笑口傾完,然後講:「好呀咁我send份agreement比你睇下呀。」一睇,啲條款辣到呢!所以由去到商界學識interpret每一句說話、表情、小動作代表啲咩,知己知彼去real time 一 路表示善意一路negotiate係一個好重要既技巧。(不過三年後既我表示,你係一個好人,遇上好多好人既機率都會大啲。)

初創有一樣好有趣既現像。愈早期既投資,風險大到有咩法律文件都無用。投資落一盤無錢賺無資產既公司,衰左叫你賠咩都無用,畢竟公司「limited」既存在就係為左limit liability。所以大家反而講個信任,拍心口一句「believe in my dream」,投資比我,我五年後會風生水起十位奉還。係呢個世界,我搵番個種「滴水之恩定當湧泉相報」、人與人之間個種美好既信任同希望。

SAFE - Simple Agreement for Equity就喺矽谷入面誕生,象徵住信任既一紙承諾。Equity 股權 — 擁有股權就等於擁有公司既一部份,作為股東有咩利潤資產我都有權去分,我仲可以透過份股東協議去要求多啲話事權。但SAFE呢份文件淨係一紙承諾 — 「本人答應如果我不久既將來小成功 -- 搵到大筆啲既投資,你就會成為我既股東」。基本上無乜法律效力,佢好似「債」咁簡單話我比錢你、無股東既權利,但又同你講:「你要等我!我一定會成功歸來封個王位比你同埋計平比你。」呢一份信任正正成就左公司,亦都成為初創界最common既投資協議。

唔好睇少SAFE所承諾既信任。現行既法律同稅制,對於one-man band或者無finance團隊既公司黎講,文書加上制度既複雜,要搵lawyer + accountant + company secretary 去幫手。再加上成本何其昂貴,唔好講笑,我開人生第一間公司既時候都係自己走上去金鐘公司註冊處。單單開公司一個手續company secretary都收多你幾千蚊。一輪股權投資所需要既離岸公司架權、股份轉讓書、股東協議、股權註冊、會計報告等等既野,對一間早期公司既成長無乜實質作用,但會佔去佢地好多時間同洗費。一個認真既founder,一個星期已經可以換黎好多既product development,而唔係同律師、會計師、投資者用幾個月去討論未有價值既股票買賣。SAFE幫你解決作為投資者最重要既兩樣野: 買入既價錢同埋股權會同黎緊既投資者一樣。你揼錢,人地下一輪揼仲多錢。同人地股權一樣,夠晒保障啦。

係呢個時侯,投資唔係賭注、亦都唔係買起人地幫你打工,而係一個雙贏既合作。你知道間公司既計劃同大方向,你信任founder既能力,任由讓佢地努力地發展,幫你將呢個承諾,變成他日上市價值連城既股票。投資者最有價值既投資唔係錢,而係賦予Founder既信任。

#律師的堅持:唔係承諾,嚴格黎講係權利 😀

#行內人話時話:YC由pre-money轉左去post-money,諗黎諗去都覺得pre-money好。YC既說法係post-money cap容易啲計valuation,對正常使用一兩次既founder無咩大分別。不過有founder貪方便,連續三四輪斷斷續續既融資都用SAFE。而用pre-money而計錯dilution數就真係⋯⋯ (Cap table有時複雜既程度,真係有公司比我發現計錯數)

#有人問過我SAFE洗唔洗搵律師,希望睇完上面,投資者同founder都明白信任既真諦係⋯⋯你唔信佢,其實就算搵律師都晒___氣。所以SAFE用法好簡單,去YC download,填名填日期填價錢,搞掂: https://www.ycombinator.com/documents/(想要多少少安全感既,見過有人加段HK as governing law + arbitration落去)