上星期四，開完一個電話會議收線後，真係好傷心。
我：「同親啲founder（創業家）傾電話，都話香港搵唔到投資者。」問：「係咪公司唔夠好？」我：「佢地係香港做左一兩年，成績算唔錯架！同一個idea同一樣能力既founder，係外國都一定有人投資。」問：「係咪佢淨係做香港市場？」我：「佢地都有plan同試下水溫，其實都唔錯，不過無錢好難做好多⋯」
不斷上演既對話，不斷原地打轉。哩啲，係一個又一個既真實故事⋯
香港依家只有Gogovan, Klook, Snapask等，我地可以有更多、更好。年青一代番工無乜選擇，想創業出一分力作出改變、自己打一片新天地，但本地初創生態圈十分之弱⋯唔係無人材，而係無資本（前文有講startup點解更需要投資）。開完電話會議既結論係，要創業要創新，對唔住，唔好係香港⋯
香港無資本？香港人咁有錢，你玩我咋？
新加坡政府幾年前己經實施多項政策，吸引外資同增加初創撥款，推動創業，海外同當地，甚至香港既VC都有係當地設立辦公室投資。港府就遲遲去到上年先推行matching investment fund（"ITVF"），配對初創公司所得到既私人投資額，你籌到1蚊政府就配對1蚊。可惜你知啦，港府既野，月前ITF先打黎努力搵人報名，當然無咩人想報⋯
用數字可能容易啲明白個差距，同一種類既matching fund計劃，Startup SG Equity係2018年投資左一共2億港幣（S$36.5 million co-investment）落52間公司，香港個ITVF至今都開始左年幾，投資左大約6千萬港幣落10間公司。政府施政報告不斷重提既創科，除左令哩隻字變buzzword（跟後生仔學番黎，簡單黎講係聽到煩既詞語）之外，有幾多係真係幫到個生態圈呢？
無政府推動，本身既私人資金呢？
對唔住，十間VC，八間唔投資本地企業。基金既運作模式好簡單，大家都係要賺錢生活，邊到回報高就去邊到。所以大部份都投資美國、以色列等。淨番既只有一兩間有原因指明要投資香港公司，就唔係哩到詳說。
另外係個人投資者，我地叫angel investor（對一間startup黎講，的確係佢地既天使）。天使投資者係香港絕大部份係銀行、法律、大企業等專業人士既高層或退休人士，對佢地黎講比較難完全明白新型經濟或者最新既科技應用。佢地係香港的確存在，只係唔夠多，亦都唔夠了解可以點幫到startups。
下一篇又講下，香港創業既都係啲咩人 -- 有你估到既，亦有你估唔到既。
