公司真正的價值何在？
用左好幾日去寫呢幾篇，因為實在有太多考量，要去將佢寫得清楚、明白，而又可以cater到大部份人。兩個月前開始做自己嘅startup，得出一個fundamental嘅問題，其實就係公司價值同風險。呢樣野係早期公司體現得最清楚，一間公司不論大小，真正嘅價值fundamental value又點會係只有現金流？現金流係市場嘅一個proxy。
尋日難得地聽左一個幾有趣嘅Big 4既webinar，最後嘅wrap up用左一個term: value eco-system。疫情嘅轉折點後「valuation」會有何改變呢？金融業內近來好鐘意用一個term去sell客：ESG（環境、社會和公司治理）。人類即使有一日醒覺社會同地球平衡嘅重要性，最遲嘅一個行業一定係金融業。十個推銷ESG嘅經理或者跟風去加重ESG嘅公司都未必了解ESG，但ESG反映左市場開始意識一間公司要有long-term value。
.
價值創造、加上持續性，就係一間好公司。
價值創造其實係講緊市場上有需求未必滿足，公司去補足呢一個空間，就值得你去賺錢。持續性則視乎你有幾可以隨左市場變遷，加上你嘅reputation去令你嘅價值係市場歷久不衰。單靠財技嘅價值，幾年一次嘅經濟衰退，好快會蝕。
有趣嘅係，寫完兩篇都發覺一間公司嘅價值，原來仲未有一套可參考嘅framework去計價。唔係香港嘅現像，而係Global Problem，因此有唔少嘅bubble以及WeWork嘅出現。公司發展嘅歷史並唔長，而公司嘅複雜性不亞於一個人。不過，喺理科人眼中，無野係無數得計。即使人類，不論係從DNA定programming都可以將人類拆到最細去分析、複製，只係在於科技同時期嘅成熟。
而初創嘅世界正正就將呢樣野拆開一塊又一塊嘅砌圖，由以前「最緊要有橋」，去到今時今日，做一間初創都有得學點去做。團隊、市場、商業模式、科技、財務健康等都係一個獨立課程，其實亦都有唔少私募基金都已經開始研發計算軟件。數據量之多同複雜性，正正就係人工智能所能解決到嘅問題。
.
而持續性，一方面係公司於數年歷史中經歷唔同事件嘅反應能力，另一方面係市場嘅長期看法。
如果要去量度公司嘅反應能力，係早期公司嘅世界，我地叫pivots。以疫情做例，如果公司反應夠快，可以搵到適合公司嘅轉型或者新產品，生存能力一定比其它公司高。而呢樣野，係理論層面上亦都係可量度嘅野。
而市場嘅長期看法，公司聲譽就係一個價值嘅無形資產。喺初創嘅世界，一早已經將社會價值放喺公司嘅vision & mission。以往嘅NGO模式一早過期，十蚊捐款過半去左Marketing；而做好事賺錢，再用賺嘅錢去做好事係一個更有影響力同規模性嘅野。而市場亦都比以前更加成熟，更加識得去分辨、reward有社會價值嘅公司，因為做好事而有更正面嘅reputation。
——————
上一篇： 【一間公司值幾錢 — 1. 現金流】
上上一篇：【一間公司值幾錢 — 2. 人類的智慧】
——————
注：當年讀錯左文科嘅理科人⋯於是係仲有A-Level嘅時候側側身揀左中間嘅商科，拜讀張五常。
公司價值點樣由早期連接到去後期，嚟緊星期三嘅FI Prime #投資解密同你拆解。
- FI Prime 專欄：https://prime.fortuneinsight.com/web/sigumdic
- 學生可享訂閲折扣價，inbox我verify後有-HKD40優惠碼。
- 訂閲所得將用作舉辦小聚，並邀請有志參與及建立香港初創生態圈及早期投資的讀者參與。唔係3秒派咭片networking，而係一場無分高低嘅交流。
