香港想移民嘅人有好多，認識咩係startup嘅就少之又少。有一間好嘅startup，你又好想移民可以係一條雙嬴嘅路。Startup Visa，喺某啲熱門國家例如加拿大、英國，係一個最優惠既移民途徑之一，甚至可以唔洗坐移民監。於是近來有唔少移民顧問都想探究呢條水路。聽落係一盤好賺錢嘅生意，不過有啲操作手法聽完不敢恭維，亦係一個唔健康嘅風氣。
Startup同普通生意界線既模糊，呢一種visa多數會透過一啲startup ecosystem內既認可機構例如incubator/ accelerator* 或者投資者去發出擔保信比政府，因為佢地日常營運就係要搵一啲好既startup，一石二鳥。多數正常嘅incubator/ accelerator都係免費，甚至比一筆initial capital你。
而移民顧問直程可以幫你諗個startup idea，收你近20-30萬加幣（即115萬-175萬港幣），再交去某啲當地門檻較低、收費約數十萬港幣嘅認可機構。Startup質素當然未必好，不過一個願打，一個願挨。有呢啲認可機構嘅出現，亦都係當地政府意料之內。
不過另一種手法就好似糖衣毒藥。
近來有移民顧問發現原來真正嘅startup，去拎startup visa好容易，亦唔需要分幾十萬比人。於是，與其為移民而諗個startup idea，倒不如搵現成嘅startup。
香港融資環境欠佳，加上疫情，移民顧問提出誘人嘅條件去幫佢地搵「投資者」，而startup就只需要去申請startup visa，將「投資者」變成團隊嘅一部分去申請移民資格。startup自己多本護照，加拿大、英國等都有更加好既startup resources，聽落好似係win-win。不過問題出現喺startup本來就係一盤長期、講信任嘅棋，喺股權/投資者選擇上做得唔好，只會將來後悔。
【Startup is a long-term game】
Startup visa大多數有規定管理團隊必需擁有一定比數嘅股份，坐底都要申請人own 10%。所謂「投資者」，你要幫佢拎startup visa，你就要賣一大截比佢。而一個早期嘅投資者，多數都只係佔個位數股份**。Founder有責任要向下一輪投資者解釋佢地係邊位，點解佔咁多。特別係外國較成熟嘅ecosystem，會更加注重早期投資者嘅好與壞（strategic value）。
即使有buy-back arrangement，即係佢申請成功後你有權向「投資者」買番佢手上嘅股份，贖回嘅時候用番「投資」收到嘅錢。做一大輪功夫去幫人移民，如果只係想要當地resources，倒不如自己直接申請。
因為香港初創投資風氣差，導致好多初創都無「strategic investor」、「咩係一個好嘅股權分配」嘅concept。投資好比生左個仔，結婚離婚都尚算簡單，但個仔唔係話斷就斷。唔少人融資後，都有後悔當年點解會同某啲投資者合作、點解會簽咁嘅條款。
Angelist Founder - Naval Ravikant講過唔少好好嘅startup道理，startup係一個長期利益關係，因為短利而fuck over對方只會得不償失。你嘅「投資者」無呢個概念，而呢句說話亦都適用於startup做嘅任何決定。為利是圖而行差踏錯，好嘅係你會上左一課，不過你間startup就bye-bye左先。
【移民，唔係走難。】
雖然唔想見到一個又一個香港人離開香港，但要搵一個新嘅地方去生活，跟隨移民政策嘅方法確保到自己喺當地係有價值，好過比一大筆錢顧問公司，who cares more about your money than you。移民顧問賺咁多，afford到大筆既marketing cost。呢啲marketing導致到又唔少人誤以為移民一定要經移民顧問，各國既移民計劃，並非為移民顧問而設，而係為你、為人才而設。
—————
如果有人真係想explore startup visa，而又唔熟英加兩地既incubator/ accelerator，歡迎inbox，樂於分享apply邊間好啲同點樣apply。
—————
** 下一篇再詳細啲講點解係咁少，關乎公司既估值以及早期投資既一啲practice。
