有一種心情，叫崇洋的自卑。
唔否認香港好多初創的確未夠成熟，但有啲咩未夠好呢？唔夠多人做初創？於是政府落力鼓吹初創風，吹左兩三年，成果係大家紛紛都覺得，叫得startup一定係要有好勁既科技 — 外國做得好聽落好勁果隻呢，總之香港無既就係科技囉。不過係咩科技？佢地都唔知 -- 星期六先收到個message，有位前輩用「actual technology」呢個term，我真係忟憎左成個下晏。
拿，個科技要聽落好型，最好就聽唔明，例如量子計算、半導體、生物科技等，而團隊再加一兩個大學教授就最好。
有時聽到都得啖笑，唔係笑呢啲科技，而係科創界就算想做好啲，連想要啲咩都唔知。加碼落去高科技產業，並唔代表推動到經濟/香港地位。
以人工智能 artificial intelligence 做例子，好多投資者* 都唔清楚到底人工智能係咩，同埋發展程度去到邊。呢個term聽落好勁，但其實你用緊既好多野，都已經有人工智能係入面。普遍既程度就好似CCTV，佢一路run緊你都唔知（而其實連CCTV都可以駁埋系統用人工智能）。而要應用人工智能，已經有好多ready-to-use既model，一啲都唔難 -- 一個有讀書唔係日日走堂既CS學生都會識，亦都有自學既例子。
當然，每一個領域都唔會有停止進步既一刻。人工智能頂尖既research的確唔係間間公司都做到，但科創有趣既地方就係科技＋應用，就算係頂尖既research，都未必係一盤好既生意。而比你遇上頂尖既research，連你自己都唔明，又點睇得出佢地既商業應用。
有唔少人都呻，同投資者形容得簡單啲，佢又覺得個技術唔夠勁；形容得複雜啲，佢又覺得點解哩條team會做到。哩種崇洋的自卑，令到投資者對名牌趨之若鶩。上年讀master搵左好多patent黎睇，有唔少patent都係「吹得就吹」。對startup黎講，有時專利既存在，就係用黎呃啲唔識野既人。
Business Model - 做生意賺錢既方法、Innovativeness - 你條橋有咩新意、Technology - 科技帶黎既價值，所謂technology startup三者之間缺一不可。
科技先進，唔代表佢有價值。「You don’t need blockchain to achieve the purpose in most of the blockchain companies」，都唔單止香港，加拿大都有所謂既quantum-inspired algorithm。創新無分高低，我相信科技帶黎既改變同價值，而唔係佢有幾型。
——
*成日用投資者黎過橋，話佢地唔識呢樣唔識個樣唔識，原因有二：1. 我都仲要搵食架，自己想像下😂唔得罪咁多ecosystem入面既唔同人 🥺2. 投資者的確係最需要認識既人，你既錢都唔著緊，其它打工既人又點會著緊過你呢？
Deep Technology又係咪真係咁難睇呢？作為一個文商科出身既人，我唔認同。所花既時間的確係要多好多，但Google, Google Scholar再加同不斷搵唔同人問野學野，並唔係想像中咁遙遠。好感恩地合作過既founder由medtech去到nanotech都無覺得我係白撞。
