近排有另一個content平台問，可唔可以寫多啲有關VC既野。教點樣開startup既有好多文，教點樣開VC既，除左law firm幾張極度複雜既structure之外，無人講到底點去做一間VC。就算去考個CFA，考完都仲係唔知到底咩係VC。
VC歷史短短幾十年間，已經發展到千變萬化 -- 特別係香港同美國。一個地方多錢，一個地方多startup。之前大概講過VC既結構同點投野，但其實哩行既空間好闊好大好有創意，所以大家營運既方法各有不同。試下講幾種唔同既VC變種。
正常VC賺錢既方法，我地叫「two & twenty」， VC搵左一大班人投資入基金到，每年收2%管理費，幫佢地投資落公司到。而20%，就係幾年後公司大個仔，股票升值賣出去賺到既錢收20%，叫carry interest。細fund投細公司，大fund投大公司。大家目的都一樣，係要幫/等間公司提升價值，最後透過上市/賣比人賣左啲股票去賺錢。外國好多VC Fund都係由ex-entrepreneur去開，因為當你創過業，你既人脈、睇startup既眼光、幫到startup既野一定會比較多。但係係香港startup未成熟既市場底下，投資外國公司既回報多數比較好，所以未唱到哩枝歌仔。
Data-driven VC係近排我好鐘意研究睇既野。要分析一間上市公司都咁難，分析一間咩都無既startup仲難。以前睇過本書The Knowledge Illusion: The Myth of Individual Thought and the Power of Collective Wisdom講Collective Thinking，人聚埋一齊，其實會無形中依靠對方既知識。香港因為少VC，其實無形交換到既知識同資訊亦都唔多，所以前排諗緊data會唔會係一個轉機，可以幫人去分析大量資訊既好工具。依家見到既data-driven VC多數只係可以focus係某一個多data既field去幫助分析，所有既數據都唔夠全面，但都可以獨當一面。例如分析B2C（business to consumer = 賣比個人消費者既生意）既公司係唔同social media既exposure同評價等等，唔講到咁複雜。而哩種VC係香港當然無啦。都幾好奇哩種model個return會唔會高啲。
Venture Builder係香港比較多既投資種類，專注係大家最叻既execution。哩類VC有啲係團隊主導出idea，有啲係投資者主導。但投資者一定係佔大部份股權，所以投資方會參與好多係營運上面，而venture builder股權夠多，可以透過startup本身賺既錢分紅去賺取回報（ROI - return on investment）。最後做得好亦都可以賣盤。香港有各式各樣既venture builder，但startup同founder其實密不可分，founder最大既incentive（股份）都無左，所以哩類venture builder既公司都係計cashflow同profitability多。
Financial Advisory唔算VC，但10間有8間都叫自己做xx capital，xx venture。而佢地背後多數有好多既投資者network，或者無限厚既面皮/skill去cold call，最終目的係幫公司籌錢。哩一個範疇良萎不齊，共同點係，最好既公司，都唔會搵中介。
Syndication係VC既散賣版。一單一單deal去搵人投資，同financial advisory唔同既係，佢地會自己投資。有「skin in the game」，而多數都係唔錯既公司。有好多唔同原因會syndicate，有人當全職，有人間唔時一兩單，又有VC投早期，後期個fund唔夠大或者公司做得好，就用syndication繼續投。不過營運起上黎工作量比VC大，特別因為大家都相信自己既眼光多過人地介紹。係香港syndication多數係貪方便，幾個熟人有投資開startup，由一個代表synidation搞掂晒啲野，其它人就唔洗擔心點傾terms、睇文件之類。
