si
gum
dic.

中秋節之典故成真

October 1, 2020

數3聲,睇下仲記唔記得中秋節嘅故事?

1

2

3

.

.

.

頭先食飯,成張飯枱原來無人記得。

話說好耐好耐之前⋯⋯唔知點解天上有十個太陽,又唔知點解有個力大無窮嘅男人叫后羿,一拉弓就射咗九個落嚟。講到呢到,外國嘅朋友已經笑到飛起。

後來佢娶咗個靚女叫嫦娥番嚟,然後又好想長生不老,食完可以飛天成仙。嫦娥又唔知點解鬧交食鬼咗長生不老藥,咁就飛咗上天,聞說月亮見到個好似嫦娥嘅人影。

呢個傳說入面,估都估佢唔到,係20世紀聽落荒謬,但係科學世界底下以上全部都唔係impossible。

1. 太陽:人類現代生活離唔開能源,無Thanos之前,人口仍然係不斷膨漲。以光同熱去製造能源,於是有人諗起無窮無盡嘅太陽似乎係一個好好嘅解決方法。呢啲嘢,當然係愈癲嘅國家先會去做。第一個人造太陽由蘇聯開始研究,2020嘅今日都仲係研究當中,由中、歐、印、日、韓、俄、美都有份比錢嘅ITER計劃,由2007年喺南法玩到宜家。偉大嘅中國入隊學嘢之後,同時都一邊研究自己嘅人造太陽「HL-2M」。聽聞2020年可以用到。咦,2020年過咗一大半,唔知幾時見到太陽呢?

2. 長生不老:MIT Technology Review上年9月個期正正就係講藥物進步到長生不老藥,其實離我地不遠。未來數十年,唔單止人口老化,發展國家嘅人愈嚟愈長命,出生率愈嚟愈低,例如15年後嘅美國老年人就會多過年輕人。於是開始有人研究,「老」其實係咪可以話係一種病,一種可以治療嘅病。Senolytics係一種打擊人類衰老細胞嘅藥,上年嘅人體臨床研究顯示的確可以減少人類嘅衰老細胞。

3. 月亮:月球一小步,人類一大步。1969年岩士唐已經幫我地探咗嫦娥,不過就仲未可以陪佢住。NASA一直好認真計劃以月球作中間點,幫人類移居上火星。佢地嘅Artemis計劃今年3月又多咗啲細節,但都只係比太空人移動同短期居住。不過,太空科技係過去幾年已經唔再係國家級任務,Elon Musk嘅Space X直接上太空,私人太空科技仲有3D打印火星都用得嘅建築物料、射衛星上去提供網絡比我哋用等等。男神Elon Musk話2050年會送1百萬人上火星,嫦娥你等我呀~

所以話呢,發夢永遠都有機會成真。

中秋節快樂!